Nɔ" ‑ɛɛ 'di nyʋ 'jea ‑kɔ' ‑tu" ɛ
23
Kea wlu' 'de Moisɩ ‑pee ka ɛ 'na: 2 ‑Ɩn ‑wlu 'de Israɛ -nyʋ ‑pee ‑ɩn ‑tmʋʋ' ʋʋpʋ ‑ɩn ‑na: ‑Kɔ' ao 'jea ‑tu" ‑ɩ ‑nɩa 'ma ‑kɔ' ɩ ka. 'De ɩa' ‑tɩ' 'ʋn ɛ aoa muɛ Israɛ -nyʋ ‑wee' 'daa ʋʋ 'je "jrui 'kɩɩɛn ‑wɛe ʋʋ 'je 'ʋn -gbɛɛ.3 Nyɔ ɔ muɛ dbo nʋa' 'de 'wɩ ‑mɛɛo" 'di, 'kaa 'wɩ ‑mɛ" 'sɔn ‑nɛ nɩɛ sabaa ‑o, ‑kwlewɩ ‑o. Aoa muɛ "jrui kɩɩan' ‑wɛe ao 'je 'ʋn -gbɛɛ 'de ao se dbo jrɛ' nʋɩ 'de ɛɛ' 'wɩ tu o, ɛ nɩɛ ‑kwlewɩ ‑o ‑ɛɛ 'di ao 'je 'ma 'nynɩ "i 'bɛɛ‑ 'de ‑ta "oo ‑ta aoa mua nɩ 'a.
4 ‑Kɔ' ‑jɩ ‑siae' mu -bo -ɩa nɔ" nyni ‑wɛe ‑ɩa ‑tɩ' 'ʋn ao 'jea nyʋ ‑wee' "jrui 'kɩɩɛn- ‑wɛe ʋʋ 'jea 'ʋn "juɛi -gbɛɛ ɩ ka.
5 "I ‑saa ‑cʋ 'a 'wɩ 'a ‑puue 'jɔ -nyiiɛ' ‑nɛɛ ‑bo 'jrʋ a sea i blu ɛ, 'sʋ ‑mɛ paakɩb nyʋ a poa 'de Kea 'a ‑tɩ' 'ʋn -o. 6 'Cʋ -nɛɛ 'ɛ 'wɩ ‑puue 'jɔ ‑mm" ‑nɛ ɛmɛ ‑nɩ ‑dipɛn' nyʋ sea ‑puun" dɛ o poa' ‑kɔ' ‑ɛ ‑jea Kea 'a 'nynɩ "i 'bɛɛ‑, 'de 'wɩ ‑mɛ" 'sɔn 'di ɛ, aoa muɛ ‑dipɛn' nyʋ sea ‑puun" dɛ o po dia'. 7 Aoa muɛ ‑kɔ' ‑nɛɛ' "i ‑saa ‑wɩ kpɔi" ‑teea' ao 'je -gbɛɛ, ao se aoa' dbo aoa nʋa see 'a jrɛ' nʋɩ 'de ɛɛ' 'wɩ tu o. 8 'De 'wɩ ‑mɛ" 'sɔn 'di ɛ aoa muɛ 'sraa ‑ɛ ‑wee' nɛ dia ‑saa' ao 'jeɛ Nyɔsoa "nyɩ. 'De 'wɩ 'a ‑mɛ" 'sɔn ‑nɛ 'di ɛ, aoa muɛ nyʋ ‑wee' 'daa ‑wɛe ʋʋ 'je "jrui 'kɩɩɛn ‑wɛe ʋʋ 'je 'ʋn -gbɛɛ' ‑wɛe ao se aoa' dbo aoa nʋa see 'a jrɛ' nʋɩ.
9 Nyɔsoa wlu' 'de Moisɩ ‑pee kewlɛ' ɛ 'na: 10 ‑Ɩn ‑wlu ka 'de Israɛ -nyʋ ‑pee: ‑bo ao nyni 'de 'blʋa 'ma mua ao "nyɩ 'a 'di ɛ ‑wɛe aoa' diiɛ 'je 'wlʋ ‑wɛe ao 'jeɛ 'cɛn aoa muɛ ɛɛ' "i ‑saa sea" 'sraa ‑sai jaa'. 11 ‑Bo saba 'wlʋ 'e ‑jei" ɛɛ' ‑sɔn ‑ɛɛ mua ‑sɩan' 'sraa ‑sai a muɛ 'de 'ʋn "juɛi jia' ‑wɛe ɔ 'jeɛ to ‑bo ɛ nɩ 'kan ‑wɛe 'ɩn 'jeɛ kpʋn. 12 'Wɩ ‑ɛɛ 'di aoa mua ɛɛ' "i -saa -jɔ tu toa' a, 'blae -ju ‑kɔ sea ‑pʋn" nɩ ‑wɛe ‑ɛ ‑nɩa ɛɛ' "i ‑sa ‑sɔn' 'di mɛ ao 'je 'sraa ɛ -wee' nɛ dia ‑saa ao 'je 'ʋn "nyɩ. 13 Faipʋ 'a "cio ‑mɛɛo" -nɩa 'sraadɛ -wlʋa 'de 'blʋ 'ʋn nyʋ "bia 'cna "jrii mɛ ao 'jeɛ "kpei po, ɛmɛ ‑bo nɛ di ‑wɛe nyʋ 'wla nmɔ ɔ' ‑sooɛ due' 'e tɔo "kpei ɛ, ‑ɛɛ 'nʋ a jaa Nyɔsoa 'a pɛe ja. 14 ‑Bo ao se ɛɛ' 'sraa tu ‑sa ao se Kea "nyɩ ke ɛ, ‑mɛ ao se ‑dipɛn' o, kplaa nyɔ da ɩ ke ɩa' 'jɔ dee‑ mɔɔ' ‑cɛ" dii. Ɛ nɩɛ kɛ' ‑o ‑ɛ ‑je nʋʋɛ 'de aoa' "ji 'a "ji 'di 'de ‑ta "oo ‑ta aoa mua "tia a.
15 -Bo saba 'wlʋ 'e -jei", 'wɩ ‑ɛɛ "kpei ao "nyɩa 'ʋn "i -saa -diiɛ ɛ 'jɔ 'wlʋa 'e ‑jei" ɛ, ao ‑sro' 'dɔɔ ‑mɛ" 'sɔn. 16 'Wɩ -tba' saba 'a ‑mɛ" 'sɔn ‑nɛ "i ɛ, aoa muɛ 'wɩ 'a kwla ‑mm" ‑sro' 'a ‑wɛe ɛɛ' 'wɩ tu 'di ɛ, ao 'je -a -ʋn 'sraadɛ dee‑ -wlʋa 'de 'blʋ 'ʋn "nyɩ. 17 Aoa muɛ 'de aoa ‑gbu" ‑sɔn -dipɛn' kplɩ 'sɔɔn ‑saa' ao 'je ja ao 'je 'mɔ Nyɔsoa "i to- ka nyɔ ɔ nʋa see ɛ, due' a muɛ faipʋ "pɩɔɔn pɩɔɔn 'ɔ "cio taan 'blea ‑wɛe nyʋ 'jeɛ ‑puun" dɛ o po nyʋ 'jeɛ pi, ɛmɛ ‑ɛɛ mu aoa diiɛ "i ‑saa -jɔ nyɔ ɔ "nyɩa Nyɔsoa nɛa'. 18 -Dipɛn' ‑nɛ mɛ ‑ke 'blae ‑tɔo -mɛ" 'sɔn ‑kɔ sea ‑pʋn" nɩɛ, ‑ɩ nɩa 'de ɩa' "i ‑sa ‑sʋn 'di ke-, bli' ‑tɔo ke 'blae 'sɔɔn ɩmɩ ao 'je 'sraa ‑ɛɛ ‑wee' nɛ dia ‑saa ao 'je 'ʋn "nyɩ, ɩ ke ɩa' dɛkwai ‑sa sraa ke faipʋ ke nmɔ nyʋ a poa 'de ɛ "kpei ke-. Ɛ nɩɛ 'sraa ‑ɛ ‑wee' nɛ dia' ‑wɛe ‑ɛɛ 'nʋ a jaa Nyɔsoa 'a pɛe ja ‑o. 19 Aoa muɛ -faan" -gbao due' 'sraa 'ʋn ‑saa 'de aoa' dɛsaʋn 'a -kwɛa' 'a ‑tɩ' ɛ ke 'blae ‑tɔo 'sɔɔn ‑ɩ ‑blea ‑sʋn due' 'de ao ke Kea 'a wlu "kpei ‑seea 'a ‑tɩ' 'ʋn. 20 'Sraa ‑sai a muɛ -dipɛn' ‑nɩa diiɛ ɛ "i ‑saa ‑jɔ ke 'blae -tɔo 'sɔɔn Nyɔsoa "nyɩ 'a ka nyɔ ɔ nʋa see ɛ. Nyɔ ɔ mui kpɔi" ‑tea' 'de Nyɔsoa 'a ‑tɩ' 'ʋn ‑wɛe ɩ 'je 'sraa ‑sai 'a dɛ nɩ-. 21 'De ɛɛ' 'wɩ tu o ɛ, aoa muɛ nyʋ ‑wee' 'daa ʋʋ 'je "jrui kɩɩɛn ʋʋ 'je 'ʋn "juɛi -gbɛɛ'‑. Ao se aoa' dbo jrɛ' nʋɩ, ɛ nɩɛ kɛ' ao 'je nʋ 'de nɔ" "oo nɔ" ‑wee' 'di 'de aoa' "ji a "ji 'jea i kpʋn 'de ‑tao" ‑ta aoa mua "tia a.
22 ‑Bo nɔ" ‑ɛ 'di aoa mua aoa' ‑kle' 'cɛan 'de ‑ta ao ‑tea a, ao se ɛɛ' ‑gbaa' wɔi ‑wee' cɛn i, ao se jɩ ‑ɩa mua 'wlaa 'tɩn i aoa muɩ "i "taa- 'de nyɔ -sea' dɛ 'jea bɛɛ ke 'dʋɩ ‑nɩa 'de aopʋ "klu 'kwa. 'Mɔ ‑nɩ Nyɔsoa aoa' Kea.
23 Nyɔsoa wluɛ Moisɩ ‑pee ɛ na: 24 ‑Ɩn ‑wlu 'de Israɛ -nyʋ ‑pee ka ‑ɩn ‑na: 'Cʋ ‑mɛ" 'sɔn ɔɔ ‑nɛ ɛ, ɛ "i ‑saa ‑wɩ a muɛ aoa' saba klaa" nɩa', aoa muɛ 'ma ‑tɩ' ‑kwlʋo poa', aoa muɛ ‑kwein blaa' ao 'je 'mʋa‑ nʋ ao 'je 'ʋn "juɛi -gbɛɛ. 25 'De ɛɛ 'wɩ tu 'di ɛ ao se aoa' dbo aoa nʋa see 'a jrɛ' nʋɩ, ‑wɛe ao 'je 'sraa ‑ɩ ‑wee' nɛ dia ‑sa ao 'je 'ʋn "nyɩ.
26 Nyɔsoa wluɛ 'de Moisɩ ‑pee kewlɛ ɛ na: 27 'cʋ ‑mɛ" 'sɔn ‑nɩa 'mʋʋa 'a 'wɩ ‑puue ‑nɛ nɩ dɛsaʋn 'a ‑kwɛ ‑wɩ klaa" ‑o. Ɛɛ muɛ -gbɛɛ' 'wɩ nɩa', aoa muɛ wɔn 'bɔa ao 'je 'sraa ‑ɛ ‑wee' nɛ dia ‑sa ao 'jeɛ Nyɔsoa "nyɩ. 28 Ao se dbo jrɛ' nʋɩ 'de ɛɛ' 'wɩ tu o, ɛ nɩɛ dɛsaʋn 'a ‑kwɛ ‑wɩ klaa" o-, ɛɛ' 'wɩ tu 'di ɛ mɛ ka nyɔ ɔ nʋa se -wɛe nyɔ 'ɔ dɛsaʋn a -kwɛa' nyɔ 'je 'kan nʋ 'de aopʋ "kpei, ‑wɛe aoa' dɛsaʋn 'je ‑kwɛ 'de 'mɔ Nyɔsoa aoa' Kea "juɛi ɛ. 29 Nyɔ "oo nyɔ ‑ɔ sea wɔn 'bɔi 'de ɛɛ' 'wɩ tu 'di ɛ nyʋ 'jeɔ 'de ɔɔ' 'cɛ ‑wi" "klu sa ‑o. 30 'Ma ‑cɛ" mɔ ‑ke ɛ nyɔ -ɔ mua dbo nʋa 'de ɛɛ' 'wɩ tu di ɛ, 'ma muɔ ɔ 'de ɔɔ' 'cɛ "klʋ ‑saa' ‑ke. 31 Ao se dbo dee jrɛ' nʋɩ. Ɛ nɩɛ kɛ' ‑o ‑ɛ ‑je nʋʋɛ 'de nɔ" "oo nɔ" ‑wee' 'di 'de aoa' "ji 'a "ji ‑wee' "klu, ta aoa mua "ti 'a a. 32 Ɛɛ nɩɛ saba aoa' ‑kwlewɩ, ‑ɛ 'di ao 'je wɔn bɔ'. Dɛ -tba' 'cʋ 'a 'wɩ ‑mɛ" nyɛ ‑nɛ 'ɛ ‑kwie" ka ‑ɛ ‑jɛɛa ɛɛ' ‑jɛ -tbɛ' "i 'a kwie 'a kpʋan' a, aoa' muɛ ɛɛ' saba -tu wɔn 'jea.
33 Nyɔsoa wluɛ 'de Moisɩ ‑pee ka ɛ na: 34 ‑Ɩn ‑wlu 'de Israɛ -nyʋ ‑pee ‑ɩn ‑na: 'Cʋ ‑mɛ" 'sɔn ‑nɛ ɛɛ' 'wɩ 'a ‑puue 'jɔ ‑mm" "kpei ɛ, ɛmɛ ‑nɩ poo" 'a ‑kɔ' nyʋ ʋa muɛ Nyɔsoa 'a 'nynɩ "i 'bɛɛ 'a 'de 'wɩ ‑mɛ" 'sɔn 'di. 35 'Ɛɛ "i ‑sa ‑wɩ o ɛ, nyʋ a muɛ "jrui 'kɩɩan ʋʋ 'je -gbɛɛ. Ao se aoa' dbo jrɛ' nʋɩ 'de ɛɛ' 'wɩ tu o. 36 'De 'wɩ ‑mɛ" 'sɔn 'di ɛ aoa muɛ 'sraa ‑ɛ ‑wee' nɛ dia ‑saa' ao 'je Nyɔsoa "nyɩ. 'Wɩ ‑mɛ" na ‑nɛ "kpei ɛ, aoa muɛ "jrui 'kɩɩan ke ‑nɛ ao 'je -gbɛɛ ‑wɛe ao 'je 'sraa ‑ɩ ‑wee' nɛ dia ‑sa ao 'je Nyɔsoa "nyɩ. Ɛ nɩɛ -gbɛɛ' 'a ‑kɔ' ‑o, ao se aoa' dbo jrɛ' nʋɩ 'de ɛɛ' 'wɩ tu 'di.
37 ‑Kɔ' nyʋ 'jea ‑tu" ʋʋ 'jea Nyɔsoa 'a 'nynɩ "i 'bɛɛ‑ ɩ mɩ ‑nao, ‑wɛe ‑ɩa ‑tɩ' 'ʋn ao 'jea Israɛ ‑wee' 'da ‑wɛe ʋʋ 'je 'ʋn -gbɛɛ' ɩ mɩ ‑nao. 'Sraa ‑ɛ ‑wee' nɛ dia ke 'sraadɛ -wlʋa 'de 'blʋ 'ʋn ke, 'sraa nyɔ ɔ -gbaa 'naa nmɔ "kpei mɛ nyʋ 'je ‑sa ɔ 'je 'ʋn "nyɩ ka ɩa' ‑kɔ' ɔ' nɩsʋn nɩa. 38 Ɩa muɛ ‑jɩ aoa ‑sa 'de saba 'wɩ ke aoa -paan' ke wlu ‑tie" cɛan 'a 'sraa ke ‑jɩ aoa ‑tea tɔ' aoa "nyɩa Nyɔsoa "kpei 'kpaa.
39 'Cʋ ‑mɛ" 'sɔn ‑nɛɛ' 'wɩ ‑puue 'jɔ ‑mm" ‑nɛ "kpei ɛ, ‑bo ao cɛn aoa' ‑kle' ɛ, aoa muɛ ‑kɔ' ‑tua" ao 'je Nyɔsoa 'a 'nynɩ "i 'bɛɛ 'de 'wɩ ‑mɛ" 'sɔn 'di. "I ‑saa ‑wɩ ke 'wɩ 'a ‑mɛ" 'sɔn ‑nɛ nɩɛ ‑kwlewɩ ‑o.
40 "I ‑saa ‑wɩ o ɛ, aoa' ‑kle' 'a 'jɔ 'dɔe o, ‑kao 'a 'sɩaɩn- o, ‑poa" wɩn o ke solɩc ‑nɩa 'de "ni wɔn i mɛ ao 'je "duo. 'De 'wɩ ‑mɛ" 'sɔn 'di ɛ aoa muɛ 'mʋa‑ nʋa' 'de Nyɔsoa aoa' Kea "juɛi. 41 Aoa muɛ ɛɛ' ‑kɔ' tu ‑tu" 'a 'wɩ ‑mɛ" 'sɔn 'de ‑sʋn 'di. Ɛ nɩɛ kɛ' ‑o ‑ɛ 'je nʋʋɛ 'de nɔ" "oo nɔ" ‑wee' 'di 'de aoa "nynuu 'a "nynuu "klu: Aoa muɛ poa' 'de 'cʋ 'a ‑mɛ" 'sɔn ‑nɛ 'di. 42 Aoa muɛ 'e poo" ‑sɔn ‑kwlea' 'de 'wɩ -mɛ" 'sɔn 'di, nyʋ "klein ‑wlʋa 'de Israɛ ʋʋa muɛ 'e poo" ‑sɔn 'pɛan 43 ‑Wɛe aoa' "nynuu 'jeɛ juo ka ‑ta 'ɩn ‑sa ʋʋpʋ 'de Esipʋ, 'ɩn ‑teɛ' ʋʋpʋ 'de poo" ‑sɔn 'bo ao ‑kwle. 'Mɔ ‑nɩ Nyɔsoa aoa Kea.
44 'Kamɔ Moisɩ 'tmʋ dɩ ‑nɩa 'de Nyɔsoa 'a ‑kɔ' ɔ' ‑tɩ' 'ʋn 'de Israɛ -nyʋ ‑pee.